شام میں پھنسے پاکستانی شہریوں کو وطن واپس لانے کا عمل تیز کر دیا گیا ہے۔ سفارتی ذرائع کے مطابق، تقریباً 400 پاکستانی لبنان کی سرحد پر پہنچ چکے ہیں، جنہیں بسوں کے ذریعے بیروت منتقل کیا جا رہا ہے۔ بیروت سے پاکستان واپسی کے لیے ابھی تک خصوصی پرواز کا انتظام نہیں ہو سکا، لیکن امکان ہے کہ یہ پرواز کل یا پرسوں روانہ ہو جائے گی۔

وفاقی کابینہ کے اجلاس میں گفتگو کرتے ہوئے وزیر اعظم شہباز شریف نے بتایا کہ شام سے 250 زائرین اور 300 دیگر پاکستانیوں کی وطن واپسی کے لیے اقدامات کیے جا رہے ہیں۔ ان کا کہنا تھا کہ لبنانی وزیر اعظم سے رابطہ ہوا ہے، جنہوں نے یقین دہانی کرائی ہے کہ چاہے پاکستانیوں کے پاس ویزا ہو یا نہ ہو، ان کی واپسی کے عمل میں ہر ممکن سہولت فراہم کی جائے گی۔

پاکستان مسلم لیگ ن کے سینئر رہنما اور سینیٹر عرفان صدیقی نے بتایا کہ اب تک 170 سے 180 زائرین کو شام سے لبنان منتقل کیا جا چکا ہے، اور لبنانی حکومت سرحد پر ہی ویزا جاری کر رہی ہے۔ بیروت کے رفیق حریری ایئرپورٹ سے پاکستانی شہریوں کی واپسی کا عمل جلد مکمل ہونے کی توقع ہے۔