پنجاب حکومت نے چین کے تعاون سے لاہور کو پاکستان کا پہلا جدید ترین اسمارٹ سٹی بنانے کا منصوبہ شروع کرنے کا اعلان کیا ہے۔ یہ فیصلہ وزیر اعلیٰ پنجاب مریم نواز کے حالیہ دورہ چین کے دوران کیا گیا، جہاں انہوں نے شنگھائی کے ضلع لونگ گانگ میں ایک نمایاں چینی ٹیکنالوجی کمپنی کا دورہ کیا۔
دورے کے دوران وزیر اعلیٰ مریم نواز نے چینی کمپنی کو پنجاب میں سرمایہ کاری کی دعوت دی اور ان کے ساتھ مختلف تجاویز پر تبادلہ خیال کیا۔ ملاقات میں وزیر اعلیٰ نے چینی کمپنی کو نواز شریف آئی ٹی سٹی میں دفتر قائم کرنے اور پنجاب میں اسمبلنگ اور مینوفیکچرنگ پلانٹ لگانے میں مکمل تعاون کی یقین دہانی کرائی۔ مزید برآں، کمپنی کو پنجاب میں ریٹیل آفس اور آفٹر سیل سروس سینٹر قائم کرنے کی پیشکش بھی دی گئی۔
مریم نواز کی چینی کمپنی کے گورنمنٹ افیئرز کے صدر، وانگ چینگ ڈونگ سے ملاقات میں ڈیجیٹلائزیشن کے مختلف شعبوں جیسے ای کامرس، صحت، تعلیم اور ایکو سسٹم پروڈکشن پر تفصیلی گفتگو کی گئی۔ اس موقع پر مریم نواز نے وانگ چینگ ڈونگ کو لاہور کے دورے کی دعوت دی تاکہ لاہور کو ماڈرن ڈیجیٹل سٹی میں تبدیل کرنے کے منصوبے پر مزید مشاورت ہو سکے۔
یہ اقدام نہ صرف لاہور کو اسمارٹ سٹی میں تبدیل کرنے میں مددگار ہوگا بلکہ پنجاب میں جدید ٹیکنالوجی کے انفراسٹرکچر کو مضبوط بنانے، روزگار کے مواقع پیدا کرنے، اور ڈیجیٹلائزیشن کے نئے دروازے کھولنے میں اہم کردار ادا کرے گا
