چیئرمین پاکستان کرکٹ بورڈ محسن نقوی آج صبح سویرے قذافی اسٹیڈیم پہنچ کر مختلف فلورز اور ہاسپٹلٹی باکسز کے فنشنگ ورک کا معائنہ کیا۔
محسن نقوی نے باکسز کے سامنے لگائی ریلنگ کے معیار کو چیک کیا اور باکسز کے باہر لگائی گئی مختلف نشستوں پر بیٹھ کر گراؤنڈ کے ویو کا جائزہ لیا۔
چیف آپریٹنگ آفیسر سمیر احمد نے فنشنگ ورک پر چئیرمین محسن نقوی کو بریفنگ دی۔
چیئرمین پی سی بی محسن نقوی نے فنشنگ ورک کو برق رفتاری سے مکمل کرنے کی ہدایت دیتے ہوئے کہا کہ فنشنگ ورک میں بین الاقوامی معیار کو ہر صورت یقینی بنایا جائے۔
چیئرمین محسن نقوی نے کہا کہ قذافی اسٹیڈیم تکمیل کے قریب ہے۔ وزیراعظم محمد شہباز شریف 7 فروری کو اسٹیڈیم کا افتتاح کریں گے۔
ان کا کہنا تھا کہ چیمپئنز ٹرافی کے میچز دیکھنے والے شائقین نئے اسٹیڈیم کی سہولتوں سے لطف اندوز ہو سکیں گے۔
پاکستان کرکٹ بورڈ کی جانب سے صرف 110 روز میں قذافی اسٹیڈیم لاہور کی 99 فیصد تکمیل کو دنیائے کرکٹ کا منفرد ریکارڈ قرار دیا گیا ہے۔
تزئین و آرائش کے بعد 24 ہزار نشستوں والے قذافی اسٹیڈیم میں مزید 10 ہزار شائقین کے بیٹھنے کی گنجائش بنی ہے اور اب 34 ہزار سے زائد شائقین بیک وقت گراؤنڈ میں میچ سے لطف اندوز ہوں گے۔
