لندن: وزیر دفاع خواجہ آصف نے کہا ہے کہ وزیراعظم شہباز شریف کی قیادت میں پاکستان ترقی کی راہ پر گامزن ہے، جبکہ ترسیلات زر میں تاریخی اضافہ قومی معیشت کی بحالی کی امید جگا رہا ہے۔لندن میں میڈیا سے گفتگو کرتے ہوئے، خواجہ آصف نے سابق وزیراعظم اور مسلم لیگ ن کے قائد نواز شریف سے ملاقات کے لیے آمد پر کہا کہ نواز شریف کا حالیہ دورہ برطانیہ محض طبی معائنے کے لیے ہے، اور اس کا سیاسی پہلو سے کوئی تعلق نہیں۔
انہوں نے کہا کہ مارچ 2025 کے دوران اوورسیز پاکستانیوں نے 4.1 ارب ڈالر کی ترسیلات زر بھیج کر ایک نیا سنگ میل عبور کیا ہے، جو ملکی تاریخ میں پہلی بار ہوا ہے۔ خواجہ آصف کا کہنا تھا:
پیسے نہ بھیجنے کی شیخیاں مارنے والوں کو اپنی اوقات پتا چل گئی۔وزیر دفاع نے مزید کہا کہ اوورسیز پاکستانی دل سے اپنے وطن سے محبت کرتے ہیں، اور ان کی محنت سے ہی ملک کی معیشت سنبھل رہی ہے۔ انہوں نے تجویز دی کہ اوورسیز کنونشن دنیا کے مختلف ممالک میں باقاعدگی سے منعقد کیے جانے چاہئیں تاکہ بیرون ملک پاکستانیوں کا اعتماد مزید مضبوط ہو۔
ادھر اسٹیٹ بینک آف پاکستان کی جاری کردہ رپورٹ کے مطابق مارچ 2025 کے دوران ترسیلات زر میں سالانہ بنیاد پر 37.3 فیصد اور ماہانہ بنیاد پر 29.8 فیصد اضافہ ریکارڈ کیا گیا۔ ماہرین کے مطابق یہ پیش رفت بیرون ملک پاکستانیوں کے اعتماد اور حکومت کی موثر پالیسیوں کا ثبوت ہے۔
خواجہ آصف نے آخر میں کہا کہ ہم پر بھی مشکل وقت آیا، لیکن ہم پاکستان سے بھاگے نہیں تھے۔