سعودی عرب نے وزٹ ویزوں کی مدت ختم کرنے والے غیرملکیوں کو بڑی سہولت فراہم کرتے ہوئے ایک ماہ کی توسیع دینے کا اعلان کر دیا۔ یعنی جن لوگوں کے وزٹ ویزے ختم ہوگئے ہیں وہ مزید ایک مہینہ سعودی عرب میں قیام کرسکتے ہیں۔
واضح رہے کہ سعودی حکومت نے پاکستان سمیت ان 14 ممالک کے شہریوں کو دوبارہ ملٹی انٹری وزٹ ویزا جاری کرنا شروع کر دیا ہے جن پر حج سے پہلے پابندی عائد کردی تھی۔
یہ ویزا ایک سال تک کے لیے ہوتا ہے، جس سے آپ ہر دورے پر 90 دن تک قیام کر سکتے ہیں۔یہ ویزا سیاحتی، کاروباری یا خاندانی ملاقاتوں کے لیے بنیادی سہولت فراہم کرتا ہے اور اس سے سعودی عرب کے مختلف شہروں کا بار بار سفر ممکن ہوتا ہے۔
سعودی محکمہ پاسپورٹ کی جانب سے جاری بیان میں کہا گیا ہے کہ یہ نیا قانون آج سے نافذ العمل ہو چکا ہے، وہ تمام تارکین وطن جو کسی بھی قسم کے وزٹ ویزے پر سعودی عرب میں موجود ہیں اور ان کے ویزوں کی مدت ختم ہو چکی ہے، وہ ’ابشر‘ کے ذریعے آن لائن درخواست دے سکتے ہیں۔
سعودی حکام کا کہنا ہے کہ مقررہ فیس اور جرمانے کی ادائیگی کے بعد ان کے وزٹ ویزوں میں ایک ماہ کی توسیع کر دی جائے گی۔
اس سہولت کا مقصد ایسے افراد کو قانونی پیچیدگیوں، بھاری جرمانوں اور سزا سے بچانا ہے جو وزٹ ویزا ختم ہونے کے باوجود سعودی عرب میں موجود ہیں۔ توسیع حاصل کرنے کے بعد وہ بغیر کسی اضافی سزا کے اپنے ممالک واپس جا سکیں گے۔