اسلام آباد : ریٹائرڈ ملازمین کے لیے طویل انتظار کے بعد بالآخر ایک بڑی خوشخبری آ گئی ہے۔ ایمپلائز اولڈ ایج بینیفٹس انسٹی ٹیوشن (EOBI) سے پنشن حاصل کرنے والے لاکھوں پنشنرز کو ستمبر 2025 میں اگست کی پنشن کے ساتھ اضافی رقم بمعہ تمام واجبات یکم ستمبر کو ادا کر دی جائے گی۔
ای او بی آئی کے باخبر ذرائع نے تصدیق کی ہے کہ جنوری 2025 سے اعلان کردہ پنشن میں 1,500 روپے ماہانہ اضافہ جو کئی ماہ سے زیر التوا تھا، وہ اب واجبات سمیت یکم ستمبر کو ادا کیا جائے گا۔ یعنی تمام پنشنرز کو آٹھ ماہ کی اضافی رقم بمعہ موجودہ پنشن ایک ساتھ فراہم کی جائے گی۔
یاد رہے کہ وفاقی حکومت نے جنوری 2025 میں ای او بی آئی پنشن کو 10,000 روپے سے بڑھا کر 11,500 روپے ماہانہ کرنے کا اعلان کیا تھا، جسے بعد ازاں وفاقی کابینہ نے بھی منظور کر لیا تھا۔ تاہم، اضافی رقم کی ادائیگی تاحال مؤخر تھی، جس کی وجہ سے بزرگ پنشنرز میں بے چینی پائی جا رہی تھی۔
یہ اقدام نہ صرف مالی سہولت کا باعث بنے گا بلکہ ان بزرگ شہریوں کے لیے ایک احترام اور فلاح کا اظہار ہے جنہوں نے اپنی زندگیاں محنت میں گزاریں۔ ستمبر کی ادائیگی میں شامل تمام واجبات کی رقم ان پنشنرز کو ایک وقتی مالی ریلیف بھی دے گی، خاص طور پر مہنگائی کے موجودہ دور میں۔
حکومتی سطح پر ای او بی آئی پنشن کو بہتر بنانے کے لیے یہ اضافہ ایک پہلا عملی قدم ہے۔ ماہرین کے مطابق مستقبل میں اس میں مزید بہتری کی امید ہے، تاکہ بڑھتی ہوئی مہنگائی میں پنشنرز کی زندگی سہل ہو سکے۔