کنگ سلمان سینٹر برائے انسانی امداد نے سال 2025 کے دوران دنیا کے مختلف ممالک میں اپنے فلاحی و امدادی منصوبوں کا سلسلہ بھرپور انداز میں جاری رکھا ہے، جس کا مقصد ضرورت مند طبقات کی مدد، متاثرہ معاشروں کی بحالی اور انسانی تکالیف میں کمی لانا ہے۔
پاکستان میں سینٹر نے سندھ کے اضلاع لاڑکانہ، خیرپور، جامشورو اور مٹیاری کے علاوہ پنجاب کے مظفرگڑھ اور بہاولنگر میں 4265 غذائی پیکٹ، خیمے اور سلِیپنگ بیگز تقسیم کیے، جن سے 30 ہزار 560 سیلاب متاثرین نے براہِ راست فائدہ اٹھایا۔ یہ اقدام رہائشی امداد اور سردیوں کی کٹس کی تقسیم کے منصوبے کے چوتھے مرحلے کا حصہ ہے، جس کا مقصد قدرتی آفات سے متاثرہ خاندانوں کو سرد موسم میں سہارا فراہم کرنا ہے۔
ادھر افغانستان میں بھی کنگ سلمان سینٹر نے انسانی ہمدردی کے تحت اپنی سرگرمیاں جاری رکھتے ہوئے کابل کے باباجان بریگیڈ کیمپ میں واپس آنے والے خاندانوں کے درمیان 101 غذائی پیکٹ تقسیم کیے، جن سے 606 افراد مستفید ہوئے۔ یہ تقسیم 2025-2026 کے غذائی تحفظ اور ہنگامی امداد کے منصوبے کے تحت عمل میں آئی، جس کا مقصد افغان بھائیوں کے غذائی مسائل کم کرنا اور ان کی زندگیوں میں استحکام پیدا کرنا ہے۔
اسی دوران ترکیہ میں سینٹر نے صوبہ ہاتائے میں ایک رضاکارانہ طبی منصوبہ شروع کیا، جس کے تحت متاثرہ افراد کو مصنوعی اعضا، بحالی اور فزیوتھراپی کی سہولیات فراہم کی گئیں۔ اس منصوبے میں 13 ماہر رضاکاروں نے حصہ لیا، جنہوں نے 37 فزیوتھراپی سیشنز، 26 مصنوعی اعضا کی تنصیب، 45 جمالیاتی و اصلاحی اعضا کی فراہمی اور 50 برقی معاون آلات فراہم کیے، تاکہ متاثرہ افراد کی زندگی کے معیار کو بہتر بنایا جا سکے۔
یہ تمام سرگرمیاں اس بات کی واضح مثال ہیں کہ سعودی عرب انسانیت کی خدمت کے عالمی مشن پر گامزن ہے۔ کنگ سلمان سینٹر برائے انسانی امداد و فلاح نہ صرف خطے میں بلکہ دنیا بھر میں انسانی ہمدردی کی علامت بن چکا ہے — جو بلا امتیاز مذہب و قوم، ہر ضرورت مند تک امید، مدد اور زندگی کی نئی کرن پہنچا رہا ہے۔