اسلام آباد : اردن کے فرمانروا اور مسلح افواج کے سپریم کمانڈر، شاہ عبداللہ دوم، نے حال ہی میں پاکستان کا دورہ کیا، جس دوران انہوں نے گلوبل انڈسٹریل اینڈ ڈیفنس سلوشنز (GIDS) اور ٹلہ فیلڈ فائرنگ رینجز کا معائنہ کیا۔
پاک فوج کے شعبہ تعلقات عامہ (آئی ایس پی آر) کے مطابق، شاہ عبداللہ کے ہمراہ شہزادی سلمیٰ بنت عبداللہ اور اردنی سول و عسکری حکام کا وفد بھی موجود تھا۔ فیلڈ مارشل سید عاصم منیر نے دیگر سینیئر حکام کے ساتھ شاہی مہمانوں کا استقبال کیا۔
گلوبل انڈسٹریل اینڈ ڈیفنس سلوشنز میں شاہ عبداللہ کو ادارے کے ڈھانچے، صلاحیتوں اور مصنوعات کے پورٹ فولیو پر تفصیلی بریفنگ دی گئی۔ بعد ازاں، وہ ٹلہ فیلڈ فائرنگ رینجز کا دورہ کرنے کے لیے روانہ ہوئے، جہاں انہوں نے شریک دستوں اور ائیر کریوز کی اعلیٰ تربیت، پیشہ ورانہ مہارت اور عملی تیاری کو سراہا۔
اس موقع پر وزیراعظم شہباز شریف نے شاہ عبداللہ اور عوامِ اردن کے لیے پاکستان کے گہرے احترام اور محبت کا اظہار کیا اور کہا کہ یہ دورہ دونوں ممالک کی دیرینہ دوستی، باہمی اعتماد اور امن و ترقی کے مشترکہ عزم کی عکاسی کرتا ہے۔
شاہ عبداللہ اور دیگر مہمانوں نے مشترکہ فائر اور مینوور مشق کا عملی مظاہرہ بھی دیکھا، جس میں ملٹی ڈومین آپریشنز، روایتی و فضائی فائر پاور اور مربوط زمینی کارروائیاں شامل تھیں۔
اس سے قبل، شاہ عبداللہ نے فیلڈ مارشل عاصم منیر کو آرڈر آف دی ملٹری میرٹ (فرسٹ ڈگری) سے نوازا، جو دونوں ممالک کے درمیان عسکری تعاون کے فروغ میں ان کی غیرمعمولی خدمات کے اعتراف میں دیا گیا۔
آئی ایس پی آر نے بتایا کہ شاہ عبداللہ کا پاکستان کا دو روزہ دورہ تاریخی اخوت، بھائی چارے اور قریبی تعلقات کو مزید مضبوط کرنے کے لیے سنگِ میل ثابت ہوا ہے۔ چیف آف آرمی اسٹاف نے پاکستان اور اردن کے مضبوط دفاعی شراکت دار کے رشتے کو اجاگر کیا اور عسکری تعاون میں مزید فروغ کے عزم کا اعادہ کرتے ہوئے خطے کے امن و استحکام پر زور دیا۔