سعودی عرب میں مادا کارڈز کے ذریعے ای کامرس فروخت اکتوبر 2025 میں اپنی تاریخ کی بلند ترین ماہانہ سطح پر پہنچ گئی، جہاں مجموعی فروخت کا حجم 30.7 ارب سعودی ریال سے تجاوز کر گیا۔ یہ غیر معمولی اضافہ ڈیجیٹل ادائیگیوں اور آن لائن خریداری کے بڑھتے رجحان کی واضح عکاسی کرتا ہے۔
سعودی مرکزی بینک (ساما) کی جانب سے اکتوبر 2025 کے لیے جاری کردہ شماریاتی بلیٹن کے مطابق، ای کامرس فروخت میں سالانہ بنیاد پر 68 فیصد اضافہ ریکارڈ کیا گیا۔ اکتوبر 2024 کے مقابلے میں فروخت کا حجم تقریباً 12.4 ارب ریال زیادہ رہا، جب گزشتہ سال اسی مہینے میں ای کامرس فروخت قریباً 18.3 ارب ریال تھی۔
رپورٹ کے مطابق رواں سال کی تیسری سہ ماہی کے دوران مادا کارڈز کے ذریعے ای کامرس فروخت کا مجموعی حجم 88.3 ارب ریال تک پہنچ گیا، جو سہ ماہی بنیاد پر 15.2 فیصد اضافے کی نمائندگی کرتا ہے۔ یہ حجم دوسری سہ ماہی میں ریکارڈ ہونے والے 76.6 ارب ریال کے مقابلے میں قریباً 11.6 ارب ریال زیادہ ہے۔
ماہانہ بنیاد پر بھی ای کامرس فروخت میں نمایاں اضافہ دیکھا گیا۔ اکتوبر 2025 میں فروخت کا حجم ستمبر 2025 کے مقابلے میں 6 فیصد زیادہ رہا، جو تقریباً 1.6 ارب ریال کے اضافے کے برابر ہے، جبکہ ستمبر میں ای کامرس فروخت کا حجم 29.1 ارب ریال ریکارڈ کیا گیا تھا۔
اعداد و شمار کے مطابق جنوری سے اکتوبر 2025 کے عرصے میں مادا کارڈز کے ذریعے ای کامرس فروخت میں مجموعی طور پر 47.3 فیصد اضافہ ہوا۔ جنوری 2025 میں فروخت کا حجم 20.9 ارب ریال تھا، جو اکتوبر تک بڑھ کر تقریباً 9.9 ارب ریال اضافے کے ساتھ نئی سطح پر پہنچ گیا۔
ساما نے وضاحت کی ہے کہ یہ اعداد و شمار آن لائن شاپنگ ویب سائٹس، موبائل ایپلیکیشنز اور ڈیجیٹل والٹس کے ذریعے مادا کارڈز سے کی جانے والی ادائیگیوں پر مشتمل ہیں، جبکہ کریڈٹ کارڈز کے ذریعے ہونے والی ٹرانزیکشنز اس رپورٹ میں شامل نہیں کی گئیں۔
ماہرین کے مطابق یہ اعداد و شمار سعودی عرب میں ڈیجیٹل معیشت، کیش لیس ادائیگیوں اور وژن 2030 کے اہداف کی جانب تیزی سے بڑھتی پیش رفت کی عکاسی کرتے ہیں۔