امام حرم شیخ عبدالرحمن السدیس نے اسلامی افواج کے درمیان پل تعمیر کرنے کے ضمن میں سعودی وزارت دفاع اور مسلح افواج کی کاوشوں کو سراہتے ہوئے اس سے جڑے پاکستانی فوج کے نمایاں کردار کو سراہا ہے۔
پاکستان میں تعینات سعودی پریس اتاشی ڈاکٹر نائف العتیبی کی جانب سے ایکس پر پوسٹ کی گئی ایک ویڈیو کے مطابق امام حرم نے پاکستانی عسکری وفد سے ملاقات کے دوران گفتگو کرتے ہوئے دونوں ممالک کے دیرینہ تعلقات سمیت پاک فوج کے کردار کو سراہا۔
وفد کو خوش آمدید کہتے ہوئے امام حرم شیخ عبدالرحمن السدیس کا کہنا تھا کہ وہ سعودی حکومت خاص طور پر خادم الحرمین شریفین ان کے ولی عہد اور وزیر دفاع کی کاوشوں کو قدر کی نگاہ سے دیکھتے ہیں۔
’اسی طرح ہم وزارت دفاع اور سعودی مسلح افواج میں ہمارے دینی بھائیوں کی ان عظیم کوششوں کو سراہتے ہیں جو وہ اسلامی افواج کے درمیان پل تعمیر کرنے، انہیں مضبوط بنانے اور ان کے تعلقات کو گہرا کرنے کے لیے کررہے ہیں۔‘
امام حرم کے مطابق اس سلسلے میں پاکستانی فوج کا نمایاں کردارہے، کیونکہ ہمیں پورا یقین ہے کہ وہ مسلمانوں کے تمام مقدسات خصوصاً حرمین شریفین کے دفاع کے لیے اپنی کوششوں میں سنجیدہ ہیں۔
امام حرم نے سعودی عرب اور پاکستان کو ایک جسم اور سر پر دو آنکھوں کی مانند قرار دیا۔ ’تمام اقدامات ان کے سچے عقیدے، اخلاص، ایمان اور مملکت سعودی عرب سے محبت اس کے مقدسات کے احترام اور حرمین شریفین کے زائرین، حجاج کرام اور معتمرین کی خدمت کے جذبات کی عکاسی کرتے ہیں۔