واشنگٹن / تہران : مشرقِ وسطیٰ میں بڑھتی ہوئی کشیدگی کے بیچ سابق امریکی صدر ڈونلڈ ٹرمپ نے ایران کو ایک بار پھر کڑی دھمکی دے دی ہے۔ اپنے سوشل میڈیا پلیٹ فارم "ٹروتھ سوشل” پر ٹرمپ نے دعویٰ کیا کہ امریکی فضائی حملے ایران کی جوہری تنصیبات کو "صفحۂ ہستی سے مٹا چکے ہیں اور اگر ضرورت پڑی تو امریکہ دوبارہ حملہ کرنے میں ہچکچاہٹ نہیں کرے گا۔
ٹرمپ کا یہ بیان ایرانی نائب وزیر خارجہ عباس عراقچی کے اس اعتراف کے بعد سامنے آیا جس میں انہوں نے امریکی و اسرائیلی بمباری کے باعث ایرانی جوہری تنصیبات کو "شدید نقصان” پہنچنے کا اعتراف کیا۔ عراقچی کے مطابق ایران کا جوہری پروگرام فی الحال رک چکا ہے، لیکن ایران یورینیم کی افزودگی سے کبھی دستبردار نہیں ہوگا۔
21 جون کو امریکی فضائیہ نے B-2 بمبار طیاروں کے ذریعے ایران کے حساس ترین جوہری مقامات ، نطنز، فردو اور اصفہان کو نشانہ بنایا۔ ان حملوں میں فردو کا وہ زیرِ زمین مرکز بھی شامل تھا جو نصف میل گہرائی میں واقع ہے۔ سی آئی اے، امریکی محکمہ دفاع اور بین الاقوامی جوہری توانائی ایجنسی (IAEA) نے ان حملوں کو "ایران کے ایٹمی ڈھانچے کے لیے کاری ضرب” قرار دیا ہے۔
سی آئی اے ڈائریکٹر جون ریٹکلف کے مطابق، 18 گھنٹوں میں 14 انتہائی طاقتور "بنکر بسٹر” بم گرائے گئے، جنہوں نے زیرِ زمین تنصیبات کو تباہ کر دیا۔ IAEA کے سربراہ رافائل گروسی نے بھی اس نقصان کو "انتہائی شدید” قرار دیا۔
اسرائیلی جوہری توانائی ادارے نے بھی تصدیق کی ہے کہ فردو کا مقام "ناقابلِ استعمال” ہو چکا ہے جبکہ نطنز میں سینٹری فیوجز ناقابلِ مرمت ہیں۔ ان کے مطابق ایران حملوں سے پہلے افزودہ یورینیم کو منتقل کرنے میں ناکام رہا، جس سے اس کے ایٹمی عزائم کو کئی سال پیچھے دھکیل دیا گیا ہے۔
دوسری جانب، ایران نے ان حملوں کو اپنی خودمختاری پر حملہ قرار دیتے ہوئے کہا ہے کہ اگرچہ پروگرام متاثر ہوا ہے، مگر افزودگی سے پیچھے ہٹنا ممکن نہیں۔ عباس عراقچی نے یہ بھی واضح کیا کہ ایران فی الوقت امریکہ سے کسی قسم کے مذاکرات کا ارادہ نہیں رکھتا۔
حالیہ امریکی حملوں سے قبل اسرائیل نے بھی خفیہ آپریشنز کے ذریعے ایران کے 14 جوہری سائنس دانوں اور کئی اعلیٰ فوجی افسران کو ہدف بنایا۔ ماہرین کے مطابق یہ مشترکہ کارروائیاں ایران کے جوہری پروگرام کو برسوں تک محدود کر سکتی ہیں۔