سعودی میڈیا کے مطابق کل اتوار کو سعودی عرب کے چیف آف جنرل اسٹاف لیفٹیننٹ جنرل فیاض بن حامد الرویلی نے ایران کا ایک روزہ سرکاری دورہ کیا۔ دورے کے دوران انھوں نے ایرانی دارالحکومت تہران میں اسلامی جمہوریہ ایران کی مسلح افواج کے چیف آف جنرل اسٹاف میجر جنرل محمد باقری سے ملاقات کی۔
دونوں افواج کے سربراہوں نے دفاعی شعبوں میں تعاون بڑھانے اور دو طرفہ تعلقات کی بہتری پر زور دیا۔
سعودی عرب کے چیف آف جنرل سٹاف نے اسلامی جمہوریہ ایران کے اسسٹنٹ چیف آف سٹاف برائے انٹیلی جنس اور سکیورٹی امور میجر جنرل غلام محرابی سے بھی ملاقات کی جس میں مشترکہ دلچسپی کے موضوعات اور امور پر تبادلہ خیال کیا گیا۔
