پنجاب پولیس کی سپرنٹنڈنٹ، عائشہ بٹ نے پاکستان کا نام عالمی سطح پر روشن کر دیا! انہیں انٹرنیشنل ایسوسی ایشن آف ویمن پولیس (IAWP) کی جانب سے 2025 ایکسی لینس ان پرفارمنس ایوارڈ کے لیے منتخب کر لیا گیا ہے۔ یہ باوقار اعزاز انہیں اسکاٹ لینڈ کے گلاسگو میں ہونے والی 62ویں IAWP سالانہ تربیتی کانفرنس کے دوران دیا جائے گا، جہاں دنیا بھر سے پولیسنگ کے شعبے میں نمایاں کارکردگی دکھانے والی خواتین کو سراہا جاتا ہے۔
IAWP کی صدر، جولیا جیگر نے ایک خط میں تصدیق کی کہ یہ ایوارڈ عائشہ بٹ کی غیر معمولی خدمات اور پولیسنگ کے لیے ان کی غیر متزلزل وابستگی کے اعتراف میں دیا جا رہا ہے۔ اس شاندار کامیابی پر پنجاب کے انسپکٹر جنرل آف پولیس، ڈاکٹر عثمان انور نے عائشہ بٹ کو مبارکباد دی اور کہا کہ یہ ایوارڈ پاکستان کے لیے ایک بڑا اعزاز ہے۔ ہر سال یہ اعزاز دنیا بھر سے صرف ایک خاتون پولیس افسر کو دیا جاتا ہے، اور اس مرتبہ یہ فخر پاکستان کی بیٹی کے حصے میں آیا ہے۔
عائشہ بٹ اس وقت گوجرانوالہ میں سٹی ٹریفک پولیس آفیسر (CTO) کے طور پر خدمات انجام دے رہی ہیں۔ پنجاب پولیس نے ان کی اس کامیابی کو تمام پولیس افسران، بالخصوص خواتین اہلکاروں کے لیے باعثِ فخر اور قابلِ تقلید مثال قرار دیا ہے۔ یہ کامیابی نہ صرف پاکستان میں خواتین کے بڑھتے ہوئے کردار کی علامت ہے بلکہ عالمی سطح پر ان کی قائدانہ صلاحیتوں کا بھی اعتراف ہے۔