اسلام آباد/نئی دہلی: بھارت کی جارحیت کا بھرپور جواب دیتے ہوئے پاکستان نے ڈیجیٹل محاذ پر ایسا کاری وار کیا ہے جس نے بھارتی سیکیورٹی اداروں اور حکومتی نظام کی بنیادیں ہلا کر رکھ دی ہیں۔ "آپریشن بُنيَان مرصُوص” کے تحت پاکستانی سائبر ماہرین نے بھارت کی درجنوں حساس ویب سائٹس کو ہیک کر کے نہ صرف ڈیٹا چوری کر لیا بلکہ اسے عالمی سطح پر بے نقاب بھی کر دیا ہے۔
ہیک کی گئی ویب سائٹس میں بھارتی آسام رائفل، ڈیپارٹمنٹ آف اٹامک انرجی، انڈین ڈیفنس پروڈکشن، ہندوستان ایروناٹکس لمیٹڈ، بارڈر سیکیورٹی فورس، مہاراشٹر الیکشن کمیشن اور دیگر اہم ادارے شامل ہیں۔ ان سائٹس پر واضح الفاظ میں لکھ دیا گیا:
انڈیا دہشتگردی کی آماجگاہ ہے!
پاکستانی ہیکرز نے بھارتی حکمران جماعت بی جے پی کی آفیشل ویب سائٹ کو بھی ہیک کر کے اس کا ڈیٹا اڑا دیا۔ دیگر متاثرہ اداروں میں کرائم ریسرچ انویسٹگیشن ایجنسی، بھارت ارتھ موورز لمیٹڈ اور آل انڈیا نیول ٹیکنیکل سپروائزری سٹاف ایسوسی ایشن شامل ہیں۔
انڈین ڈیفنس پروڈکشن کا حساس ڈیٹا ڈارک ویب پر فروخت کے لیے پیش کر دیا گیا ہے، جب کہ یونیک آڈنٹیفیکیشن اتھارٹی آف انڈیا (آدھار سسٹم) اور انڈین ایئرفورس کا بھی اہم ڈیٹا لیک کر دیا گیا ہے۔
اس حملے میں 2500 سے زائد بھارتی سرویلنس کیمرے بھی ہیک کر لیے گئے، جس سے بھارت کی ڈیجیٹل ناکامی کھل کر دنیا کے سامنے آگئی ہے۔ بھارت کے انفارمیشن ٹیکنالوجی میں ترقی کے دعوے اس سائبر طوفان میں بہہ گئے۔
یہ ہے جدید دور کی جنگ، جہاں ہتھیاروں کے بجائے "کوڈ” دشمن کی بنیادیں ہلا دیتا ہے۔ پاکستان کا ڈیجیٹل وار جاری ہے اور بھارت کا سائبر سسٹم شدید دباؤ میں ہے