پاکستان میں شوال کا چاند نظر آگیا، ملک بھر میں کل عیدالفطر مذہبی جوش و خروش سے منائی جائے گی

پاکستان بھر میں رمضان المبارک کی رونقیں اختتام پذیر ہوچکی ہیں، اور اب عیدالفطر کی خوشیاں اپنے عروج پر پہنچ گئی ہیں۔ مرکزی رویت ہلال کمیٹی کے سربراہ مولانا عبد الخبیر آزاد نے باضابطہ طور پر اعلان کیا کہ ملک بھر سے چاند نظر آنے کی مستند شہادتیں موصول ہوچکی ہیں، جس کے بعد عیدالفطر کل، مذہبی عقیدت و احترام کے ساتھ منائی جائے گی۔

ملک بھر میں جشنِ عید کی تیاریاں عروج پر
چاند نظر آتے ہی ملک بھر میں خوشی کی لہر دوڑ گئی۔ بازاروں میں رش بڑھ گیا، مٹھائی کی دکانوں پر لمبی قطاریں لگ گئیں، اور درزیوں کے پاس آخری لمحات میں کپڑے سلوانے والوں کی بھیڑ جمع ہوگئی۔ گھروں میں عید کے پکوانوں کی تیاریوں نے بھی زور پکڑ لیا، جبکہ بچے نئے کپڑے پہننے کے شوق میں بے حد پرجوش نظر آئے۔

دلچسپ امر یہ ہے کہ پاکستان میں بوہری کمیونٹی نے گزشتہ روز ہی عید منالی، جبکہ عوامی نیشنل پارٹی کے سربراہ ایمل ولی خان نے بھی گزشتہ روز عید منانے کا اعلان کیا۔ اس طرح ملک میں دو دن عید منانے کی روایت برقرار رہی۔
دوسری جانب، آج سعودی عرب، متحدہ عرب امارات اور دیگر خلیجی ممالک میں عیدالفطر مذہبی عقیدت کے ساتھ منائی جا رہی ہے۔ برطانیہ، کینیڈا اور یورپ کے مختلف ممالک میں 31 مارچ کو چاند نظر آنے کی توقع ہے، جس کے بعد وہ اپنی عید منائیں گے۔

عیدالفطر نہ صرف خوشیوں اور شکرانے کا دن ہے بلکہ یہ امت مسلمہ کے اتحاد کی علامت بھی ہے۔ اس موقع پر پوری قوم کو چاہیے کہ ایک دوسرے کے ساتھ محبت اور بھائی چارے کا مظاہرہ کرے اور ضرورت مندوں کو اپنی خوشیوں میں شامل کرنا نہ بھولے۔