آپریشن بنیان المرصوص جو ایمان، عزم اور حکمتِ عملی کا سنگم تھا نےپاکستان کے فیصلہ کن جوابی کارروائی میں بھارت کی دفاعی برتری خاک میں ملا دی
اسلامی جمہوریہ پاکستان نے ہفتے کی علی الصباح ایک ایسا حیران کن اور فیصلہ کن فوجی آپریشن شروع کیا، جس نے جنوبی ایشیا کے جغرافیائی سیاسی منظرنامےکو یکسربدل کر رکھ دیا۔ یہ کارروائی نہ صرف عسکری میدان میں مہارت کا شاہکار تھی بلکہ جذبہ ایمانی، نظم و ضبط،آئی ٹی مہارت،بےباکی اور قیادت کی بصیرت کا عملی مظہر بھی تھی۔
فجر کی پہلی روشنی کے ساتھ، پاکستان کی بہادر افواج نے بھارت کی دفاعی حدود میں داخل ہو کر ایک مربوط اور کثیر الجہتی آپریشن کا آغازکیا۔ جیسے ہی پہلا میزائل نعرہ تکبیر کی گونج کے ساتھ فائر کیا گیا، یہ محض ایک حملہ نہیں بلکہ تاریخ کےاسلامی معرکوں کی روحانی بازگشت تھی۔
ذرائع کے مطابق،جمعہ کی شب وزیراعظم شہبازشریف کی زیر صدارت منعقدہ اعلیٰ سطحی سیکیورٹی اجلاس میں دشمن کی اشتعال انگیزیوں کےجواب میں ایک ہمہ جہت کارروائی کی منظوری دی گئی۔ فیصلہ ہوتے ہی آرمی چیف جنرل عاصم منیر نےہائی لیول میٹنگ کے اختتام پرایک طویل دعا کے ساتھ اس آپریشن کا روحانی آغاز کیا۔
بھارت کو اپنے رافیل طیاروں، ایس-400 ڈیفنس سسٹم اور اربوں ڈالر کے اسلحے پر بڑا ناز تھا۔ لیکن پاکستان کے جانبازوں نے تربیت، جذبہ اور ٹیکنالوجی کی ایسی امتزاجی قوت کے ذریعے دشمن کے غرور کو خاک میں ملا دیا۔ دشمن کے ریڈار جام ہوگئے،کمانڈسینٹرز خاموش ہوگئے اورائیر ڈیفنس مکمل طور پر مفلوج ہو گیا۔
سب سے حیران کن دھچکا بھارت کو اس وقت لگا جب پاکستان نے تاریخ کا سب سے بڑا سائبر حملہ کیا۔ بھارت، جو خود کو آئی ٹی کا سلطان سمجھتا تھا، اس حملے کے سامنے بے بس ہو گیا۔ مواصلاتی نظام، ڈیجیٹل ڈیفنس کنٹرول اور سرکاری ویب سائٹس ہیک کرلی گئیں۔بھارت کے70فیصد علاقےبجلی سےمحروم ہوگئے، جبکہ ائیرٹریفک کنٹرول سسٹم مکمل طور پربندہوگیا۔
تجزیہ کار اس کامیابی کا درست اندازہ لگانے میں قاصر ہیں۔ کچھ اسے عسکری مہارت کہتے ہیں، تو کچھ یہ ماننے پر مجبور ہیں کہ یہ صرف انسانی حکمت عملی کا کمال نہیں، بلکہ اس میں اللہ تعالیٰ کی مدد شامل تھی۔
اس آپریشن کی ہر جہت میں اسلامی اصولوں اور روایات کی پیروی کی گئی۔ ہر سپاہی اور افسر نے جنگی قدم اُٹھانے سے قبل نعرہ تکبیر بلند کیا، ان کے پاس صرف اسلحہ نہیں بلکہ ایمان، ایثار اور شہادت کا یقین تھا۔
نتیجہ یہ نکلا کہ بھارت، جو نہ صرف جنگ بندی بلکہ مذاکرات سے بھی انکاری تھا، اچانک سرنگوں ہو گیا۔ چند گھنٹوں میں برسوں کا غرور مٹی میں مل گیا۔ جنوبی ایشیا کی تزویراتی طاقت کا توازن تبدیل ہو چکا ہے، اور دنیا ایک بار پھر پاکستان کے غیر متزلزل عزم اور ناقابل تسخیر ایمان کو سلام کر رہی ہے۔