وزیرِاعظم شہباز شریف کی خصوصی دعوت پر انڈونیشیا کے صدر پرابووو سوبیانتو 8 اور 9 دسمبر 2025 کو پاکستان کا سرکاری دورہ کریں گے۔ دفترِ خارجہ کے مطابق یہ صدر سوبیانتو کا پہلا دورہ پاکستان ہوگا، جبکہ انڈونیشیا کی جانب سے آخری صدارتی دورہ 2018 میں اس وقت کے صدر جوکو ویدودو نے کیا تھا۔
اس سال پاکستان اور انڈونیشیا کے درمیان سفارتی تعلقات کے قیام کی 75ویں سالگرہ بھی منائی جارہی ہے، جس کے پیش نظر یہ دورہ خصوصی اہمیت کا حامل سمجھا جا رہا ہے۔ صدر سوبیانتو اعلیٰ سطحی وزارتی وفد کے ہمراہ اسلام آباد پہنچیں گے اور وزیرِاعظم شہباز شریف سے وفود کی سطح پر مذاکرات کریں گے، جب کہ صدر پاکستان آصف زرداری سے بھی ملاقات کریں گے۔
دورے کے دوران چیف آف آرمی اسٹاف اور چیف آف ڈیفنس فورسز، فیلڈ مارشل عاصم منیر بھی صدر سوبیانتو سے ملاقات کریں گے۔ ترجمان دفترِ خارجہ کے مطابق مذاکرات میں دوطرفہ تعلقات کو مزید مستحکم بنانے کے لیے وسیع البنیاد ایجنڈے پر بات ہوگی۔ اس میں تجارت، سرمایہ کاری، دفاع، صحت، آئی ٹی، ماحولیات، تعلیم اور ثقافت سمیت مختلف شعبوں میں تعاون کے نئے مواقع کا جائزہ لیا جائے گا۔
مزید برآں، دونوں ممالک علاقائی اور عالمی سطح پر تعاون بڑھانے پر بھی غور کریں گے، اور متعدد مفاہمتی یادداشتوں پر دستخط بھی متوقع ہیں۔ ترجمان دفتر خارجہ نے کہا کہ پاکستان اور انڈونیشیا کے تعلقات دیرینہ اور دوستانہ ہیں، جو مشترکہ اقدار اور باہمی مفادات پر مبنی ہیں۔ صدر پرابووو سوبیانتو کا یہ دورہ دونوں ممالک کے تعلقات کو مزید مضبوط کرنے اور دوطرفہ تعاون کے نئے دروازے کھولنے کا اہم موقع فراہم کرے گا