چیف آف ڈیفنس فورسز فیلڈ مارشل سید عاصم منیر نے کرسمس کی خوشیوں میں شریک ہو کر پاکستان کی مسیحی برادری کو کرسمس کی دلی مبارکباد دی اور امن، ہم آہنگی اور خوشحالی کے لیے نیک تمناؤں کا اظہار کیا۔
پاک فوج کے شعبہ تعلقاتِ عامہ (آئی ایس پی آر) کے مطابق فیلڈ مارشل سید عاصم منیر نے راولپنڈی کے کرائسٹ چرچ میں منعقدہ کرسمس کی خصوصی تقریبات میں شرکت کی، جہاں انہوں نے مسیحی برادری کے ساتھ خوشیوں کے اس مقدس موقع کو منایا۔
آئی ایس پی آر کے مطابق فیلڈ مارشل نے مسیحی برادری کو کرسمس کی دلی مبارکباد دیتے ہوئے کہا کہ پاکستان کی بنیاد مذہبی آزادی، مساوات اور رواداری پر رکھی گئی ہے۔ اس موقع پر انہوں نے قائداعظم محمد علی جناح کو خراجِ عقیدت پیش کیا اور بانی پاکستان کے اس وژن کو اجاگر کیا جس میں تمام شہریوں کو مذہبی آزادی اور مساوی حقوق کی ضمانت دی گئی ہے۔
فیلڈ مارشل سید عاصم منیر نے کہا کہ اقلیتوں کے حقوق کا تحفظ پاکستان کے نظریے کی اساس ہے اور یہی وہ اصول ہے جو قوم کو مضبوط اور متحد بناتا ہے۔ انہوں نے قومی ترقی اور سلامتی میں پاکستانی مسیحیوں کے کردار اور خدمات کو سراہتے ہوئے بین المذاہب ہم آہنگی، باہمی احترام اور اتحاد کی اہمیت پر زور دیا۔
آئی ایس پی آر کے مطابق فیلڈ مارشل نے کہا کہ پاکستان کی اصل طاقت مساوی مواقع اور آئینی اقدار میں مضمر ہے، جو مذہب، نسل، ذات اور عقیدے سے بالاتر ہیں۔ انہوں نے شہریوں کی عزت، سلامتی اور مساوی حقوق کے تحفظ کے لیے افواجِ پاکستان کے غیر متزلزل عزم کا اعادہ بھی کیا۔
اس موقع پر مسیحی برادری کے رہنماؤں نے فیلڈ مارشل سید عاصم منیر کے دورے پر شکریہ ادا کرتے ہوئے وطن کے دفاع، مذہبی ہم آہنگی اور قومی یکجہتی کے فروغ میں پاک فوج کے کردار کو سراہا۔